Stundaskrá

Um stundaskrána
Rólegur leikur
Við byrjum daginn á rólegum viðfangsefnum sem börnin velja sjálf s.s. að lesa bækur, teikna, púsla, perla og leira.
Morgunverður
Ef borðstjóri dagsins (eitt barn er borðstjóri dagsins) er mættur hjálpar hann til við að undirbúa morgunverð og leggja á borð. Einn borðstjóri er tilnefndur úr barnahópnum daglega sem sér um að leggja á borð, með aðstoð eftir þörfum. Morgunverðurinn er mjög fjölbreyttur. Stundum er hafragrautur, stundum jógúrt, morgunkorn eða ristað brauð að ógleymdu lýsinu. Þegar hvert og eitt barn hefur lokið við að borða gengur það frá eftir sig, þvær sér um munnin, sest inn í bókakrók og velur sér bók að skoða.

Sögustund
Í sögustund eftir morgunverð er farið yfir daginn, hvaða dagur er í dag, hvernig er veðrið o.s.frv. og lesin er eða sögð saga.

Val/hópastarf
Þá er komið að vali, eða hópastarfi. Í vali velja börnin sér sjálf viðfangsefni og leikfélaga. Þau hafa góðan tíma til að skipuleggja og setja upp leik á eigin forsendum. Þau læra að standa við val sitt og leiknum stjórna þau sjálf. Í vali eru í boði margvísleg viðfangsefni sem börnin velja hverju sinni. Í vali læra börnin líka að þau geta ekki alltaf fengið það sem þau vilja þegar þau vilja. Þannig geta svæði sem hugur stóð til að velja verið upptekin, þá þarf að gera gott úr því og velja það næst besta. Val barnanna er skráð daglega.

Börnunum er skipt niður í fjóra aldursmiðaða hópa sem heita: Gulur, Rauður, Grænn og Blár (sjá stundaskrá). Allir fara í hópastarf einu sinni í viku nema Guli hópur sem fer tvisvar. Í hópastarfi eru börnin að störfum í sínum jafningjahópi með sínum hópstjóra. Þar er verið að kenna, þjálfa og æfa ýmsa færni barnanna. Í hópastarfi er unnið er með margvísleg viðfangsefni s.s. sköpun, tónlist, spil, vettvangsferðir, markvissa málörvun, ritmálsörvun o.s.frv. Sami kennari hefur sama hópinn allt skólaárið.

Útivera –fataklefinn
Markmiðin í fataklefanum eru að börnin verði sjálfstæð, geti klætt sig úr og í og velji hlífðarfatnað miðað við veður. Börnin læra að hirða um fötin sín, auka orðaforða sinn og líkamsvitund Börnin eru ekki öll í einu í fataklefanum að klæða sig í útifötin. Ef það er góður leikur í gangi einhverstaðar er sjálfsagt að leyfa þeim hópi að vera aðeins lengur inni og einnig er hægt að fara fyrr út.

Eins og sjá má í stundaskránni er útivera töluverður hluti skólatímans. Útivera er hverjum holl. Þar er hreint loft og nóg pláss. Úti veitum við hreyfiþörfinni útrás. Úti gilda líka aðrar reglur en inni. Þar má hafa eins hátt og hver vill, hlaupa og hamast. Þar fer líka fram frjáls leikur Aðstæður eru metnar hverju sinni varðandi lengd útivistarinnar.

Tónlist
Skólinn hefur gert samning við Tónlistarskóla Rangæinga. Tveir elstu árgangarnir fara í tónlistartíma einu sinni í viku undir handleiðslu tónlistarkennara. Þar er farið yfir undirstöðuþætti tónlistarinnar og grunnurinn lagður að frekara tónlistarnámi hjá börnunum.

Íþróttir yngri
Einu sinni í viku fara yngstu árgangarnir í íþróttir í íþróttasal Laugalandsskóla undir handleiðslu leikskólakennara. Þar er farið í ýmsa leiki og hreyfiþroskinn efldur á margvíslegan máta. Þar er líf og fjör og nóg plássJ. Íþróttafatnaður er ekki nauðsynlegur en fötum er fækkað eins og þurfa þykir. Ekki er farið í sturtu eftir íþróttir yngri barna.

Samverustund
Skólinn er ekki deildarskiptur en börnunum er skipt eftir aldri í sögustund og samverustundum að morgni og í hvíld/hlustun. Samverustundirnar efla hópkennd og sjálfstæði. Þar gerum við okkur margt til gamans. Við syngjum, dönsum, æfum okkur í tjáningu og að koma fram á annan hátt. Á mánudögum kemur séra Halldóra Þorvarðardóttir til okkar og þá eru samverustundirnar ekki tvískiptar. Það er alltaf gaman hjá sr. Halldóru og með henni eflum við kristilegt siðgæði okkar, syngjum og höfum gaman saman.

Hádegisverður
Við erum svo heppin að fá alltaf tvíréttaðann, góðan og hollan hádegisverð sem eldaður er í mötuneyti Laugalandsskóla. Á meðan á samverustund stendur hjálpar borðstjóri dagsins til við að undirbúa hádegisverðinn. Mikil stærðfræðikennsla fer fram þegar lagt er á borð með spurningum s.s. : Hvað eru mörg börn við hvert borð? Hverja vantar? Hvað þarf þá að leggja á borð fyrir marga? Hversu marga diska þarf, glös o.s.frv.Borðstjóri býður hinum börnunum að gjöra svo vel og þarf þá að tilkynna hvað er í matinn. Í matartímanum gefst góður tími til samræðna. Þá æfum við okkur einnig í borðsiðum og almennri kurteisi.Hvert barn gengur frá eftir sig og þvær sér um munn og hendur. Við leggjum áherslu hollann og fjölbreyttan mat og að matmálstímar séu rólegar og notalegar samverustundir.

Hvíld
Eftir góðan og næringarríkan hádegisverð er gott að hvíla sig í ró og næði. Eldri börnin fara í hvíld í Leiklandi. Þar er legið á dýnum með kodda og teppi ef vill á meðan hlustað er á skemmtilega sögu. Yngri börnin fara í hvíld í Hopplandi með sæng og kodda enda sofna þau flest. Þar hafa þau snuð sem það nota eða eru með uppáhalds bangsann sinn. Kennarar liggja alltaf hjá börnunum og sjá til þess að þar skapist friður og ró og hvíldin verði öllum sem ánægjulegust. Eftir hvíldina höfum við öll endurnýjað kraftana og erum tilbúin að takast á við starf dagsins.

Íþróttir eldri
Tveir elstu árgangarnir fara í íþróttir/íþróttaskóla einu sinni í viku undir handleiðslu íþrótta- og leikskólakennara ásamt yngstu árgöngum Laugalandsskóla. Það er liður í samstarfi skólastiganna. Þar eflum við hreyfiþroskann, þolið, samvinnu í hóp o.fl.
Á vorin og haustin förum við í sund og æfum sundtökin. Nauðsynlegur búnaður eru sund- og íþróttaföt auk handklæðis.

Myndlist
Eftir hvíld er á þessum tíma boðið upp á myndlist. Stundum eru í boði verkefni sem allir geta tekið þátt í saman eða unnið er í minni hópum. Gugga sér um myndlistina á þessum tíma, enda með framhaldsmenntun í því fagi.

Bókasafn
Sumir fara á bókasafnið í Laugalandsskóla á þessum tíma, skoða bækur, fá bækur lánaðar og skila þeim sem við höfum haft að láni. Við höfum mjög greiðan aðgang að bókasafninu og fáum að leggja inn óskir ef það eru sérstakar bækur sem við viljum að bókasafnið kaupi. Stundum eru grunnskólabörn á bókasafninu um leið og við og þá kynnumst við þeim betur.

Gönguferðir
Sumir fara í gönguferðir á þessum tíma. Þar kynnumst við betur nærumhverfi leikskólans, aukum þekkingu okkar á náttúrunni og lærum að njóta hennar. Ef sauðburður er í Nefsholti fáum við að kíkja á lömbin og stundum höfum við verið svo heppin að sjá lamb fæðast. Í Götu er fiskeldi og þangað höfum við farið að skoða fiskana og svo höfum við fengið að gefa þeim. Þegar hestarnir hennar Herdísar eru komnir á hús er alltaf hægt að fara í hesthúsið og skoða hestana, strjúka þeim og gefa þeim tuggu. Annars er náttúran hér óþrjótandi uppspretta leikja og skoðunar.

Samverustund
Eftir hressandi útivist förum við öll saman í samverustund þar sem tekið er að fækka í barnahópnum.

Hressing
Á meðan á samverustund stendur er hressingin undirbúin með borðstjóra dagsins. Í hressingunni fáum við oftast nýbakað brauð og álegg , mjólk að drekka og stundum eitthvað ,,óvænt” á eftir.

Sögustund
Eftir hressinguna er sögustund í bókakrók og að því loknu val þar til skóladegi líkur.