//Á döfinni//

// Fréttir frá Laugalandsskóla//

..:: Sund ::..

Nú er orðið hlýrra úti og skóla-sundið byrjað af fullum krafti. Við viljum eindregið minna nemendur á að taka sundfötin með í skólann, og foreldra yngri barna að vera vakandi yfir að sundpokarnir skili sér úr og í skóla.

..:: Frídagar í apríl og maí ::..

Þrír frídagar eru framundan í apríl og maí en þeir eru sumar­dagurinn fyrsti (22. apríl), uppstigningardagur (13. maí) og annar í hvítasunnu 24. maí).

..:: Vorpróf ::..

Vorprófin byrja þriðjudaginn 18. maí og þeim lýkur miðviku­­­­daginn 26. maí.

Alla prófdaga er keyrt heim kl 13:25 nema miðvikudaginn 26. maí en þá lýkur skóla kl. 11:15.

..:: Vorferðalag::..
..::10. bekkjar ::..

Sunnudaginn 23. maí fer 10. bekkur í sína árlegu vorferð. Víða verður farið og margt gert, m.a. klettasig og litbolta­keppni. Þau snúa aftur heim miðvikudaginn 26. maí.

..::Sumardagurinn fyrsti::..

Að venju heldur foreldra- og kennarafélag Laugalands­skóla hátíð á sumardaginn fyrsta og hefst hún kl. 11:00.

..:: Söngskemmtun ::..

..:: Árshátíð ::..

..:: Gestakennari frá Norður Dakota ::..

Vikuna 12.-16. apríl fengum við heimsókn frá Norður Dakota eins og flestir ættu að hafa orðið varir við. Heimsóknin er hluti af listamanna prógrammi sem Laugalandsskóli tekur þátt í en menntayfirvöld hér og í Norður Dakota senda sín á milli listamenn sem fara svo og heimsækja ákveðna skóla. Í ár fengum við lagahöfundinn og söngvarann Chuck Suchy. Chuck er kúa­bóndi í Norður Dakota sem hefur aukaatvinnu af tónlist sinni. Hann heldur tónleika reglulega víða í Bandaríkjunum, en hefur einnig komið í skóla úti og spjallað við nemendur og sungið með þeim. Hann semur lög og texta sem tengjast hans daglega lífi og nýtir hughrif sem hann verður fyrir, til að búa til málverk með tónlist, eins og hann orðar það sjálfur.

Chuck bæði söng og kenndi nemendum að semja sín eigin lög þann tíma sem hann var hér. Hann heim­sótti alla bekki nær daglega. Mestum tíma varði hann þó með elstu bekkjunum en áhugi nemendanna var alveg jafnmikill í 1.bekk sem 10. bekk.

Á  myndunum hér fyrir ofan er Chuck með yngstu nemendunum en þau teiknuðu myndir á meðan þau hlustuðu á hann syngja. Sum skildu skiljanlega meira en önnur en það breytti engu um það að allir skemmtu sér vel og nutu þess að hlusta. Hann lét þau einnig taka undir bæði í söng og með hreyfingum í nokkrum lögum.  

Með í för var kvikmyndatökulið sem er að vinna heimildamynd um komu Chuck hingað til lands. Þau tóku upp bæði á mánudeginum og föstudeginum. Nemendur voru mjög spenntir og aðeins feimnir til að byrja með, en voru fljótir að venjast mynda­vél­inni og létu ekki trufla sig, þó vélin væri komin alveg upp að andlitum þeirra.   

Á fimmtudagskvöldið hélt Chuck tónleika með nemendum og foreldrar komu og fylgdust með. Söng hann lög með öllum bekkjum. Fyrst lög sem hann hafði æft með 1., 2. og 3. bekk og sungu krakkarnir með í viðlaginu og gerðu hreyfingau. Síðan söng hann lög með eldri bekkjunum sem nemendur höfðu samið með honum. Nemendur í 4. og 5. bekk höfðu samið lag um kúrekastráka og kúrekastelpur og komu þeir klæddir að hætti kúreka. Nemendur í 6. og 7. og í 8. og 9. bekk höfðu samið sitthvort lagið um eldgos og krafta í íslenskri náttúru. Nemendur í 10. bekk höfðu svo samið lag og texta sem var kveðja þeirra áður en þau tækju hið stóra skref út í alvöru lífsins, sem blasir í raun við þeim nú þegar þeir útskrfast úr grunnskóla.

Chuck ásamt nemendum 8. og 9. bekkjar       Í góðum gír með nemendum 6. og 7. bekkjar

..:: Árshátíðin ::..

Nemendur héldu árshátíð sína fyrir fullu húsi þann 12. mars. Eins og alltaf var mikil vinna lögð í skemmtiatriðin og tóku allir nemendur skólans virkan þátt en gaman er að geta þess að öll leikritin í ár voru frumsamin.

Börnin í 1.-3. bekk fluttu leikritið Ömmu rænt, en það fjallaði um geimverur og enduðu þau sitt atriði á laginu Marsbúarnir. Hugmyndina að leikritinu fengu þau meðal annars út frá námsefninu Komdu og skoðaðu himingeiminn. Nemendur 4. og 5. bekkja sömdu sjálfir sitt leikrit sem fjallaði um víkinga bæði nú á tímum og áður fyrr. Hugmynd þeirra kom einnig frá námsefni þeirra, en þeir eru meðal annars að læra um landnámið. Hugmyndaauðgin hélt áfram því næst stigu nemendur 6. og 7. bekkja á svið og fluttu leikritið Ættarmótið. Nemendur úr 8. bekk voru með atriði um flugdólga og 9. bekkur var með stuttan gamanþátt sem sýndi hvað getur gerst þegar borgarbúar leggja leið sína í sveitina. Svo var komið að leiklistarhópnum sem sýndi að þessu sinni leikritið Morð á hóteli og tónlistarvalshópurinn lék og söng í lokin nokkur lög Michael Jackson.

    6. og 7. bekkur í leikritinu Ættarmótið        4. og 5. bekkur í hlutverkum víkinga

Að loknum skemmtiatriðum fengu nemendur skólans og gestir þeirra sér hressingu í íþróttasalnum en þar báru foreldrar og forráðamenn 10. bekkinga fram gómsætar veitingar og svignuðu borðin undan krásum þeirra.
Rétt er að vekja athygli á því að fleiri myndir frá árshátíðinni eru á heimasíðu skólans. 

//Á döfinni//

// Fréttir frá Laugalandsskóla//