|
..:: Stóra upplestrarkeppninni ::..
Fyrsta lokahátíð Stóru upplestrarkeppninnar á Suðurlandi af þremur fór fram í félagsheimilinu Leikskálum í Vík í Mýrdal miðvikudaginn 7. mars kl. 14:00 – 16:00. Þar kepptu 7. bekkjar nemendur úr 6 skólum: Víkurskóla, Kirkjubæjarskóla, Hvolsskóla, Grunnskóla Vestmannaeyja, Grunnskólanum á Hellu og Laugalandsskóla. 
Keppnin fór fram í þremur hlutum. Fyrst lásu keppendur hluta úr sögu Kristínar Helgu Gunnarsdóttur; Draugaslóð, næst völdu þau úr 10 ljóðum Gyrðis Elíassonar og fluttu það og loks lásu þau ljóð að eigin vali.
Dagskráin var krydduð með alls kyns öðrum listviðburðum. Séra Haraldur M. Kristjánsson flutti ávarp, nemendur úr Víkurskóla fluttu tónlist og vinningshafar frá fyrra ári, þeir Ómar Högni Guðmarsson og Sigurður Smári Davíðsson kynntu höfunda keppninnar. Dómnefnd skipuðu þau Jón Hjartarson leikari og rithöfundur sem var formaður dómnefndar, Þorsteinn M. Kristinsson, Jón Özur Snorrason frá FSu og Hrefna Sigurjónsdóttir.
Fyrir hönd Laugalandsskóla fóru þær Guðbjörg Viðja Antonsdóttir og Halla Rún Erlingsdóttir og stóðu þær sig báðar afskaplega vel. Keppnin var hörð og margir góðir lesarar fóru í ræðupúltið en úrslitin urðu þau að í 3. sæti var Dagur Ágústsson úr Hvolsskóla, í 2. sæti var Bjarnveig Björk Birkisdóttir úr Grunnskólanum á Hellu og sigurvegari var Guðbjörg Viðja Antonsdóttir úr Laugalandsskóla.
Þetta er í tíunda skipti í röð sem nemandi úr Laugalandsskóla vinnur þessa lokahátíð og er það stórkostlegur árangur. Guðbjörg Viðja var síðan dregin út úr hópi allra sigurvegara á landsvísu og las sérvalið ljóð sitt í Ríkisútvarpinu á sumardaginn fyrsta. Útsendinguna má nálgast á vef RÚV undir heitinu Stóra upplestrarkeppnin.
..:: 10. bekkur sem kveður ::..
Brátt útskrifast enn einn hópurinn frá Laugalandsskóla. Síðastliðin ár hefur ferðasjóður greitt fyrir peysur sem nemendur í 10. bekk fá til eignar. Nafn og merki skólans er framan á en aftan á er hver peysa sérmerkt viðkomandi nemanda. Þeir 11 nemendur sem brátt ljúka nú námi sínu hér við skólann eru hér á myndinni hægra megin í peysunum sínum. Þau eru frá efri röð vinstra megin Sunneva Eik Hjaltested, Eyrún Rós Þorsteinsdóttir, Steinunn Birna Jónsdóttir, Guðrún Heiða Bjarnadóttir, Kristjana Rós Kristjánsdóttir, mið röð frá vinstri: Sebastian Valur Arvidsson, Guðlaugur Ingi Þórðarson, Ólafur Logi Guðmundsson, Gústaf Ásgeir Hinriksson, Neðsta röð f. v.: Elísabet María Björnsdóttir og Helga Sunna Sigurjónsdóttir.
Við kveðjum þennan góða hóp með stolti og þökkum fyrir samveruna undanfarin ár um leið og við óskum þeim velfarnaðar í lífinu.
Til gamans látum við fylgja með mynd af bekknum þegar þau hófu skólagöngu sína hér í 1. bekk. En eins og gengur og gerist hafa sumir farið og aðrir bæst við. 
..:: Starfendarannsóknir ::..
Undanfarin tvö ár hafa nokkrir kennarar í Laugalandsskóla tekið þátt í starfendarannsókn samhliða kennslu sinni. Kveikjan að þessu var mastersritgerðin Rýnt í störfin sem Kolbrún Sigþórsdóttir aðstoðarskólastjóri skrifaði er hún lauk M.ed. gráðu frá HÍ í stjórnunarfræðum vorið 2010.
Skilgreining á orðinu starfendarannsókn getur verið löng og flókin en þó má stytta það með því að segja að þeir sem stunda starfendarannsóknir eru að skoða eigið starf með það fyrir augum að skilja það betur og leitast við að þróa það til betri vegar.
Í þeim starfendarannsóknum sem fram hafa farið hér í Laugalandsskóla hafa kennarar og stjórnendur unnið saman tveir og tveir. Í fyrstu er lagt upp með hvað skuli skoðað sérstaklega og búin er til spurning út frá viðfangsefninu þ.e. ein spurning fyrir hvern kennara. Þessi spurning verður síðan höfð að leiðarljósi í starfendarannsókninni. Þegar búið er að setja fram spurninguna tryggja þátttakendur gagnkvæman trúnað og heita því að veita uppbyggjandi gagnrýni og vilja til að taka á móti gagnrýni á jákvæðan hátt. Að því loknu eru fundnir tímar þar sem innlit fer fram. Í okkar tilfelli hafa þetta verið tvær kennslustundir á viku. Ein kennslustund á viku þar sem A situr inni í kennslustund hjá B og ein kennslustund þar sem B situr inni í kennslustund hjá A. Síðan er fundinn tími í stundatöflunni þar sem báðir aðilar hittast og fara yfir athugasemdir hvor hjá öðrum.
Þeir sem tekið hafa þátt í starfendarannsóknum á einn eða annan hátt eru allir sammála því að vinna sem þessi eflir starfsfólk skólans faglega og stofnunina sem heild og ýtir þannig undir að nemendur fái bestu kennslu sem hægt er að fá.
Þeir sem vilja fræðast meira um starfendarannsóknir geta nálgast upplýsingar á Veraldarvefnum því að mikið hefur verið skrifað um þessa rannsóknaraðferð undanfarin ár og margir skólar eru farnir að setja þessa vinnu inn í skólastarfið. Einnig má nálgast ritgerðina Rýnt í störfin á bókasafni skólans.
..:: Glímukeppni á Ísafirði ::..
Grunnskólamót Íslands í glímu var haldið á Ísafirði þann 14. apríl. Frá Laugalandi fóru fjórir keppendur sem stóðu sig mjög vel. Þeir sem keppt hafa á grunnskólamóti Suðurlands og staðið sig vel, vinna sér þátttökurétt á þessu móti. Smári Valur Guðmarsson hélt uppteknum hætti og sigraði í 6. bekk. Annika Rut Arnarsdóttir og Eiður Helgi Benediktsson lentu í þriðja sæti í 7. bekk og Guðni Elvar Björnsson keppti í 8. bekk og lenti í fjórða sæti.
Einnig var sömu helgi haldin sveitaglíma Íslands þar sem keppt er í liðum og sigraði HSK í flokki 11-12 ára drengja með Smára Val í fararbroddi og Eiður Helgi og Guðni Elvar voru í sigurliðið HSK í flokki 12-13 ára.
Sannarlega góður árangur hjá krökkunum okkar sem tryggja glímunni sess í íþróttalífi skólans. | 
